Рустам Эмомали ва спортчилар. asiaplustj.info сайти фотосурати
Душанбе мэри ва Тожикистон футбол федерацияси президенти Рустам Эмомали Хитойда бўлиб ўтадиган XIX Осиё ўйинларида мамлакат шарафини ҳимоя қиладиган спортчилар билан учрашди. У спортчиларга омад ва муваффақиятлар тилади, шунингдек барча ғолиблар «президент совринлари» билан тақдирланишини таъкидлади.
Эмомалининг сўзларига кўра, Осиё ўйинларида олтин медални қўлга киритган спортчилар Душанбе шаҳридан уч хонали квартира ва 150 минг сомоний (13,7 минг доллар) пул мукофоти олади. Кумуш мукофот соҳиблари пойтахтдан икки хонали квартира, шунингдек 100 минг сомоний (9,1 минг доллар) билан тақдирланади. Бронза медали соҳибларига Душанбе шаҳридан бир хонали квартира ва 50 минг сомоний (4,5 минг доллар) берилади.
Осиё ўйинларида 19 спорт тури бўйича 118 нафар спортчи Тожикистон шарафини ҳимоя қилади. Дзюдочи Темур Раҳимов терма жамоа байроқдори этиб тайинланди.
XIX Осиё ўйинлари Хитойнинг Ханчжоу шаҳрида 23 сентябрдан 8 октябргача бўлиб ўтади. Мусобақада Осиёнинг 45 давлатидан бир неча минг нафар спортчилар спортнинг 40 тури бўйича 481 медаллар жамланмаси учун кураш олиб боришади.
