Исхак Масалиев. sputnik.kg сайти фотосурати
«Бутун Қирғизистон» парламент фракцияси раҳбари Исхак Масалиев Қирғизистон Жогорку Кенеши (парламенти) йиғилишида Украина билан қарама-қаршиликда Россияни очиқдан-очиқ қўллаб-қувватлаш зарурлигини билдирди. Бу ҳақда 24.kg хабар беради.
Масалиевга кўра, можаро Қирғизистоннинг иттифоқчиси бўлган Россиянинг ички иши бўлмай қолган.
«Иккинчи йилдирки, икки давлат — Россия Федерацияси ва Украина ўртасида ҳарбий тўқнашувлар давом этмоқда. Яқингача бу иттифоқдошимиз Россиянинг ички иши эди. Менимча, биз нейтрал позицияда бўлганимиз тўғри бўлган. Аммо август ойидан бошлаб Россиянинг 15 та ҳудудига бомба ва ракеталар учиб келяпти. У ерда бир миллионга яқин фуқароларимиз меҳнат қилаётгани мени ташвишга солмоқда. Иккинчидан, биз Россия билан КХШТ доирасида иттифоқчилармиз. Хавфсизлик Кенгаши аъзоси бўлмиш спикерга мурожаат қиламан, биз бу масалани чуқур ўрганиб, тегишли қарор қабул қилишимиз лозим. Биз қайдай шаклда ёрдам беришимиз мумкинлигини ўйлаб кўришимиз керак. Эҳтимол, тегишли қўмиталар Давлат Думаси билан боғланиб, масалани ҳал қилгани маъқулдир. Уларни қўллаб-қувватлашимиз керак, деб ўйлайман», — дейди депутат.
Бундан ташқари, Исхак Масалиев Миллий банкнинг Россия молия ташкилотлари билан ҳамкорликни тўхтатиш бўйича тавсиясини танқид қилди, шунингдек, Қирғизистон собиқ президенти Алмазбек Атамбаевнинг Америка ҳарбий базасини мамлакатдан чиқариб юборганидан мамнун эканини билдирган, чунки халқ вакилининг сўзларига кўра, унинг мавжудлиги ҳозирги можарога «муҳим таъсир кўрсатган бўларди».
Бироқ, кейинроқ Масалиев аниқлик киритишича, у Россиянинг қўллаб-қувватлаши билан Қирғизистоннинг Европа Иттифоқи ва Қўшма Штатлар томонидан киритилган санкцияларни бажариш бўйича мажбуриятлари адолатсиз эканини назарда тутган, шунингдек, Бишкек МҲО (махсус ҳарбий операция) учун жавобгар эмаслигини таъкидлаган.
«Қўллаб-қувватлаш ҳар хил шаклда бўлади. Акс ҳолда, биздан санкцияларга риоя қилиш талаб қилинмоқда. Яъни, Европа Иттифоқи ва Америка санкциялар жорий қилади, кейин эса биз уларга риоя қилишга мажбурмиз. Биз бу операция учун жавобгар эмасмиз. Бизнинг ягона стратегик иттифоқчимиз — Россия, деб биламан. Энг муҳим далил битта – у ерда бир миллион фуқароларимиз ишлаяпти», — дея таъкидлайди Масалиев.
