utrk.kg сайти фотосурати
Қирғизистон Адлия вазирлиги ўз сайтида республикада «хорижий вакиллар» мақомида фаолият юритаётган нотижорат ташкилотлари (ННТ) реестрини жойлаштирди. Ҳозирча бу рўйхатда фақат учта уюшма бор, деб хабар беради «Клооп» 10 сентябрь куни.
Чет элдан молиялаштириладиган нодавлат нотижорат ташкилотлари рўйхатига «Евросиё ишбилармонлар клуби» тадбиркорлар уюшмаси, JIA бизнес ассоциацияси ҳамда Fauna and Flore International компаниясининг экологик муаммолар билан шуғулланувчи филиали киритилган.
Адлия вазирлиги матбуот хизмати 9 сентябрдан бошлаб мамлакат ҳукуматининг тегишли қарори кучга кирганлиги сабабли реестрга киритиш учун аризаларни эндигина қабул қила бошлаганини маълум қилди. Эндиликда қонунга кўра, вазирлик икки ой муддатда хорижий донорлардан пул оладиган ва «сиёсий фаолият» билан шуғулланаётган уюшмалардан ташкилотларни рўйхатга киритиш учун ҳужжатларни қабул қилади.
Агар «хорижий агент» ариза топширмаса, у санкцияларга дуч келади, ҳаттоки йўқ қилинишига қадар.
ℹ️ Эслатиб ўтамиз, «Нотижорат ташкилотлари тўғрисида»ги қонунга ўзгартиришлар киритишни назарда тутувчи ҳужжат лойиҳаси жорий йилнинг 14 март куни Қирғизистон парламенти томонидан қабул қилинган эди. Шу билан бирга, халқаро экспертлар республика органларига янги қоидалардан воз кечишни бир неча бор сўрашган. Жумладан, бир қанча нуфузли инсон ҳуқуқлари ташкилотлари ҳам худди шундай баёнот билан чиқишганди.
2 апрель куни ўзгартиришлар Қирғизистон президенти Садир Жапаров томонидан маъқулланган эди. Давлат раҳбари мазкур ҳужжатнинг аҳамиятини хориждан молиялаштирилаётган нодавлат нотижорат ташкилотлари илгари ҳеч қаерда рўйхатдан ўтмагани ва ҳеч кимга ҳисобот бермаслиги билан изоҳлади. Шу билан бирга, улар хорижлик донорларнинг пулларини ўз ихтиёрига кўра ишлатишган. «Энди улар очиқ иш бошлайдилар. Аввалгидек тартибсизлик бўлмайди», — деганди республика раҳбари.
Қирғизистон раҳбари матбуот хизматининг аниқлик киритишича, қонун нодавлат нотижорат ташкилотлари фаолиятининг очиқлигини таъминлашга қаратилган. Шунингдек, назоратни кучайтириш мақсадида давлат рўйхатидан ўтказиш соҳасидаги ваколатли органга бир қатор қўшимча функциялар берилган: ташкилотлардан ички ҳужжатлар ва солиқ ҳисоботларини талаб қилиш ҳуқуқидан тортиб, уларнинг фаолиятини текширишга қадар.
