iz.ru сайти фотосурати
5 февраль куни Россияда назоратдаги шахслар реестри ишга туширилгач, ўнлаб мигрантлар унинг нотўғри ишлаётгани ва у билан боғлиқ юзага келаётган муаммолар ҳақида хабар беришган. «Агентство. Новости» (РФда чет эл агенти сифатида тан олинган) Telegram-каналида ҳуқуқ ҳимоячиси Валентина Чупикнинг ёзишича, кўпчилик банк ҳисоблари блокланганидан, чегарада ҳибсга олинганидан ёки ишдан бўшатилгандан сўнг реестрга киритилганини билиб қолишмоқда.
Чупикнинг сўзларига кўра, реестр ишга тушгач икки кун ичида унга Қирғизистон, Тожикистон, Ўзбекистон, Туркманистон, Арманистон ва Озарбайжондан 31 киши мурожаат қилган. Улардан баъзилари Россияда доимий ёки вақтинчалик яшаш рухсатномасига эга бўлган. Барча мигрантлар асоссиз реестрга киритилганлигидан арз қилишмоқда.
Ҳуқуқ ҳимоячисига мурожаат қилганларнинг аксарияти (17 киши) ҳисоблари блоклангани ҳақида банклардан, 13 нафари эса «Т-Банк» дан хабар топган. Тўрт нафари полиция томонидан реестрга киритилгани кўрсатилган ҳолда ҳибсга олинган, тўрт нафари чегарачилар томонидан Россияга киритилмаган, бир нафари эса ишдан ҳайдалган.
Чупикнинг таъкидлашича, аксарият ҳолларда текширув реестрга киритиш учун асослар бўлмаганини аниқлаган. Бешта ҳолатда мигрантларга нисбатан бошидан ноқонуний маъмурий чоралар қўлланилган, ҳуқуқ ҳимоячилари бу чораларни бекор қилишган.
«Учта ҳолатда шахсан мен ноқонуний депортацияни бекор қилдирдим, бир ҳолатда ходимимиз мамлакатга ноқонуний кириш тақиқини бекор қилган, яна бир ҳолатда доимий яшаш рухсатномаси (ВНЖ) ноқонуний бекор қилинганини бекор қилдирдим», — дейди Чупик.
Ҳуқуқ фаоли мигрантларга блокланиш хавфи туфайли зудлик билан ҳисоб рақамларидан пулларни ечиб, уйларига жўнатишни маслаҳат беради.
Baza Telegram-канали ҳам Россияда қонуний яшаётган юзлаб хорижликларнинг аккаунтлари оммавий блоклангани ҳақида хабар берган. Ҳуқуқ ҳимоячиси Александр Ким реестр ишга туширилгач, мигрантларга давлат хизматлари кўрсатишдан бош тортиш ҳолатлари кўпайганини қайд этган.
ℹ️ Чет эл фуқароларини чиқариб юбориш режими ва назоратдаги шахслар реестри тўғрисидаги қонун 2024 йил ёзида «Крокус сити холл» даги терактдан сўнг қабул қилинди. Реестрга киритилган чет элликлар депортация қилинади, жумладан, юридик шахсини ва мулкини рўйхатдан ўтказиш ҳуқуқидан маҳрум этилади.
