Ерлан Жагипаров. bureau.kz сайти фотосурати
Олмаота гарнизони Ҳарбий суди Миллий гвардия ҳарбий хизматчиси Айтчан Аубакировни археолог Ерлан Жагипаров ва Олмаота вилояти резиденти Ауез Капсалановнинг 2022 йил январь воқеалари пайтидаги ўлимида айбдор деб топди ва етти йилга озодликдан маҳрум қилди, деб хабар беради Vlast.kz.
Аубакиров Қозоғистон Республикаси Жиноят кодексининг 451-моддаси «Ваколатини суиистеъмол қилиш» бўйича айбдор деб топилган. У жазони ўртача хавфсизлик муассасасида ўтайди. Шунингдек, у полковник ҳарбий унвонидан маҳрум қилинган.
Бундан ташқари, суд марҳум археологнинг укаси Нурлан Жагипаровнинг маънавий зарарни қоплаш тўғрисидаги фуқаролик даъвосини қисман қаноатлантириб, унга 20 миллион тенге (39 минг доллар) ундирган. Нурлан Жагипаров барча пуллар акасининг қилаётган ишларига сарфланишини айтган. Ерлан Жагипаров археолог ва машҳур «петроглиф овчиси» бўлган. 2022 йил январь ойи бошида ижтимоий тармоқларда унинг оиласи ва кўплаб дўстлари томонидан қидирилаётгани ҳақидаги хабарлар пайдо бўлган ва 12 январь куни қариндошлари унинг жасади ўликхонада эканидан хабар топишган. Марҳумнинг укаси Нурлан Жагипаров айтишича, Ерланни ўликхона коридорида кишанланган, шафқатсизларча калтакланган ва юрагидан ўқ еб ўлган ҳолда топган. Ерлан Жагипаров 49 ёшда бўлган.
Мазкур иш бўйича суд жараёни ўтган йил декабрь ойида бошланган. Айблов маҳкамасида 5571-ҳарбий қисм командирининг собиқ ўринбосари 42 ёшли Аитчан Аубакиров бўлиб, у давлат айблови томонидан оғир оқибатларга сабаб бўлмиш мансаб ваколатини суиистеъмол қилишда айбланган.
Айблов хулосасидан маълум бўлишича, 2022 йил 6 январь куни соат 19.30 дан 20.00 гача Республика майдонида Қозоғистон Республикаси Миллий хавфсизлик қўмитасининг «А» махсус бўлинмаси ходимлари томонидан жабрланувчилар Жагипаров ва Капсаламов (иккаласи ҳам кейинчалик ўлдирилган – таҳр.изоҳи) ушланган. Уларни 5571-сонли ҳарбий қисмнинг 1-тезкор батальони қўриқлаган. Ҳарбий хизматчилар қўлга олинганларнинг қўлларини кишанлаган, шундан сўнг қўл ва оёқлари билан таналарининг турли қисмларига бир неча марта зарба беришган. Шунингдек, улар «маънавий ва жисмоний азоб етказган ҳолда» қурол билан ҳибсдагиларнинг белига, чотига уришган.
Бир неча соатдан кейин судланувчининг командири Аубакиров ҳисбдагиларни баррикада ортидадан олиб чиқиб, кишанларни ечган ҳолда қўйиб юборишга буйруқ берган. Аммо ҳарбий хизматчи Жагипаровнинг ўнг қўлидан кишанни ечганида, у яна калтакланишидан қўрқиб, ҳарбийни кескин итариб юборади ва Капсаланов билан биргаликда Сатпаев кўчаси бўйлаб ғарбий томонга қочади.
Подполковник Аубакиров Жагипаров ва Капсалановлар қочиб кетяпти деб ўйлаб, уларга қарата ўқ узган. Натижада иккала жабрланувчи воқеа жойида ўлган.
Суд мажлисида Аубакиров жабрланганларнинг қариндошлари ва яқинларидан кечирим сўраган ва содир бўлган воқеадан таассуфда эканини айтган. Бироқ, ҳарбий хизматчи ўз айбини тан олмаган. У судга иш йўриқнома ва буйруқларни бажарганини тушунтирган, шунингдек, комендантлик соати вақтида ҳуқуқ-тартибот кучларига одамларга қарата ўқ узишга рухсат берилганини таъкидлаган.
Қозоғистонда Қантар ёки «Қонли январь» дея номланган январдаги тартибсизликлар 2022 йил бошида содир бўлганди. Расмий маълумотларга кўра, 238 киши қурбон бўлган, 4,5 мингдан ортиқ киши жароҳатланган.
