Нурали Алиев. Ижтимоий тармоқдаги фотосурат
Қозоғистоннинг собиқ президенти Нурсултон Назарбоев набираси, бизнесмен Нурали Алиев мамлакатдаги энг йирик алоқа операторларидан бири бўлган «Транстелеком» акциядорлари таркибидан чиқишини маълум қилди. Бу ҳақда у Instagramда (РФда экстремистик деб тан олинган ва тақиқланган Meta корпорациясига тегишли тармоқ) ёзган. Алиев, шунингдек, «сотилгани муносабати билан» компания директорлар кенгаши раиси лавозимини тарк этишга қарор қилган. Бироқ, у келишув тафсилотларини ошкор қилмаган.
Алиевнинг эслатишича, 2013 йили «Транстелеком»ни қабул қилиб олганида, компания темир йўл соҳасида хизматлар кўрсатувчи маҳаллий алоқа оператори бўлган. «Ўшанда олдимизда кенг кўламли вазифалар турганди: ТТКни замонавий, юқори технологияли компанияга айлантириш, инновацияларни жорий этиш ва янги йўналишларни ривожлантириш. Жамоамизнинг саъй-ҳаракатлари ва мижозларимизнинг қўллаб-қувватлаши туфайли биз буларнинг барчасига эришолдик», — деб таъкидлайди у.
Тадбиркор санаб ўтган натижалар орасида компания соф фойдасининг 290 фоизга ошгани, булутли технологиялардан олинган даромаднинг 52 баробарга ошгани ва қарз юкининг 50 фоизга камайганлиги қайд этилган.
«Энди эстафетани компания ҳаётидаги кейинги босқичга берган ҳолда ишонаманки, «Транстелеком» бундан кейин ҳам жадал ривожланади, бозордаги ўз мавқеини мустаҳкамлайди ва ўзининг инновациялари ва профессионаллиги билан мижозларни», — деб ёзган Алиев.
Нурали Алиев — Нурсултон Назарбоевнинг тўнғич набираси, Қозоғистоннинг энг бой 75 тадбиркори рўйхатига киритилган. 2016 йили хусусийлаштириш дастури доирасида у IТ, алоқа ва энергетика соҳаларида телекоммуникация, рақамлаштириш ва тизим интеграциясига ихтисослашган «Трантелеком» АЖ акцияларининг 49 фоизини сотиб олган. 2021 йили Нурали Алиевга тегишли бўлган «Unit Telecom» МЧЖ компания акцияларининг 75 фоизини қўлга киритган. Қолган 25% «НК «Қазақстан темір жолы» га тегишли.
