Видеодан скриншот
Қозоғистон президенти Қосим-Жомарт Тўқаев Олмаота аэропортида гаровга олинган одамни қутқариб қолган шахсга давлат мукофоти топширишни буюрди. Бу ҳақда давлат раҳбари матбуот котиби Руслан Желдибай хабар берди.
Президент «жиноятчини зарарсизлантирган одамнинг жасорати ва маҳоратига» тан берган.
Ҳодиса 7 март куни ички рейслар терминалида содир бўлган. Олмаота аэропорти маълумотларига кўра, маҳаллий вақт билан соат 11:45 атрофида «йўловчи сифатида бузғунчи одам» парвоз олдидан текширув ҳудудига кириб келган. Эркакдан ҳужжатларини кўрсатишни сўрашган, шундан сўнг у текширчи ходима сочидан ушлаб, пичоқ билан қўрқита бошлаган.
Orda.kz хабарига кўра, гаровдаги ходимани қутқарган шахс Мусо Абдраим. У аэропортда дўстини парвозга кузатаётган бўлган. Аэропортга ташриф буюрганлардан бири ходимани ушлаб турганини кўриб, эркак унинг ўрнига ўзини таклиф қилган. Бироз вақт ўтгач, у ҳужумчидан пичоқни тортиб олган, бу эса жиноятчини ҳибсга олишга имкон берган. Мусо Абдраим нашрга берган интервьюсида ўзининг илгари спортчи бўлганини, тай бокс ва жанг санъатининг бошқа турлари билан шуғулланганини айтган.
Ҳужум қилган шахс 67 ёшда экани маълум. Аэропорт ходимасини гаровга олган эркак «бу ерда ҳамма нарсани портлатиб юбораман» деб таҳдид қилган. Унинг мотивлари ҳақида ҳеч қандай маълумот йўқ. Транспорт полицияси департаменти ҳужум бўйича жиноий иш очилганини маълум қилган. Гумонланувчи вақтинчалик сақлаш ҳибсхонасига жойлаштирилган.
