Тошкент метрополитенининг Чилонзор йўналишида янги ўнта бекат қурилиб, Тошкент трактор заводи даҳасигача узайтирилади. 20 март куни мамлакат президенти Шавкат Мирзиёевга тақдим этилган жамоат транспортини ривожлантириш лойиҳасида шундай режалар кўзда тутилган, деб хабар беради унинг матбуот хизмати
«Тайёрланган янги лойиҳага кўра, метрополитеннинг Чилонзор йўналиши Тошкент трактор заводи даҳасигача узайтирилади. Бу тармоқ 30 та маҳалла, 148 минг аҳолини қамраб олади», — дейилади хабарда.
👉 Чилонзор йўналишини ТТЗгача узайтириш режалари бир неча йил аввал муҳокама қилинган эди. 2021 йили Тошкент ҳокимияти ер ости линиясини Мирзо Улуғбек ёки Буюк Ипак йўли кўчалари орқали ётқизишнинг иккита вариантини ишлаб чиққанди. Биринчи ҳолатда, йўналиш узунлиги 8,6 км бўлиб, кунига 62 минг йўловчини ташиш имкониятига эга бўлади. Иккинчи вариантда маршрут узунлиги 8 км бўлиб, кунига 55 минг киши хизмат қилади. Қурилиш ишлари беш йил давом этиши кутилганди. Бироқ, мамлакат президенти аввал тақдим этилган лойиҳаларни қайта кўриб чиқиш ва муқобил вариантларни таклиф қилишни буюрганди.
Янги лойиҳа ҳақида ҳозирча маълумотлар йўқ.
ℹ️ Тошкент метрополитенининг Чилонзор йўналиши 1977 йил 6 ноябрда фойдаланишга топширилган бўлиб, биринчи босқичда тўққизта бекат қурилган – «Олмазор»дан «Амир Темур хиёбони»га қадар. 1980 йил август ойида иккинчи босқичда яна учта метро бекати ишга туширилди, охиргиси «Буюк ипак йўли». Йўналиш узунлиги 16,3 км. Бугунги кунда Тошкент шаҳрида умумий узунлиги 58,5 км дан ортиқ ва 43 та бекатдан иборат бешта метро йўналишлари фаолият кўрсатмоқда.
