Қирғизистон терма жамоаси футболчилари. ҚФИ матбуот хизмати фотосурати
Қирғизистон ва Ўзбекистон миллий терма жамоалари жаҳон чемпионати учинчи саралаш босқичининг саккизинчи тур ўйинларини ўтказди.
Қирғизистон терма жамоаси сўнгги икки Осиё кубоги чемпиони Қатар терма жамоасини Бишкекда 3:1 ҳисобида мағлуб этди. Қирғизистонликларга тўртинчи саралаш босқичига чиқиш имкониятини сақлаб қолиш учун ғалаба керак эди. Қатарликлар учун ғалаба тўғридан-тўғри жаҳон чемпионатига йўлланма олиш учун назарий имкониятини сақлаб қоларди, дуранг эса саралашнинг кейинги босқичига ўтишни кафолатлаган бўларди.
Учрашув биринчи бўлимда тенг кечди. Иккала жамоа ҳам ҳужум қилишди, аммо майдон эгалари биринчи бўлиб гол уришди. Қирғизистон терма жамоаси сардори Валерий Кичин тўғридан-тўғри жарима зарбасини амалга ошириб, ҳисобни очди. Иккинчи бўлим бошида қатарликлар Лукас Мендес ёрдамида ҳисобни тенглаштиришди. Аммо орадан уч дақиқа ўтиб Мендес Кай Меркга нисбатан қаттиқ қўполлик қилди ва майдондан четлатилди, натижада меҳмонларнинг қўли қисқа қолди, қирғизистонликлар эса бундан унумли фойдаланишди. 83-дақиқада Александр Мишченко узоқдан йўллаган зарбаси билан жамоасини олдинга олиб чиққан бўлса, учинчи голга Гулжигит Алиқулов ва Алимардон Шукуров муаллифлик қилди.
Ўзбекистон терма жамоаси Теҳронда эронликлар билан 2:2 ҳисобида ўйнади. Мезбонлар жаҳон чемпионати йўлланмасини кафолатлаш учун фақат мағлубиятга учрамасликлари керак эди, натижада улар бунга эришдилар. Ўзбекистон терма жамоасига эса жаҳон чемпионати йўлланмасини кафолатлаш учун фақат ғалаба керак эди.
16-дақиқадаёқ Ҳожимат Эркинов тўпни Эрон дарвозасига йўллади. Эронликлар фақат 52-дақиқада Меҳди Таремининг саъй-ҳаракатлари эвазига ҳисобни тенглаштиришга муваффақ бўлишди. Бироқ, кейинги ҳужумда ўзбекистонликлар жарима зарбасини амалга оширишди ва Аббос Файзуллаев тўғридан-тўғри зарба йўллаб жамоасини яна олдинга олиб чиқди. Аммо 83-дақиқада Тареми дубл қайд этиб, ушбу учрашувдаги якуний ҳисобни ўрнатди.
А гуруҳининг яна бир учрашувида БАА терма жамоаси Шимолий Кореяни 2:1 ҳисобида мағлуб этди ва тўғридан-тўғри жаҳон чемпионатига чиқиш имкониятини сақлаб қолди. Шимолий Корея тўртинчи саралаш босқичига чиқиш имкониятидан маҳрум бўлди.
Гуруҳдаги 8 ўйиндан сўнг турнир жадвалидаги ҳолат қуйидагича: Эрон – 20 очко, Ўзбекистон – 17 очко, БАА – 13 очко, Қатар – 10 очко, Қирғизистон – 6 очко, КХДР – 2 очко.
5 июнь куни бўлиб ўтадиган 9-турда Қирғизистон КХДР билан нейтрал майдонда ўйнайди, Ўзбекистон БААга ташриф буюради, Қатар эса Эронни қабул қилади.
