Урсула фон дер Ляйен. Ўзбекистон президенти матбуот хизмати фотосурати
«Марказий Осиё – Европа Иттифоқи» саммитида иштирок этиш учун Ўзбекистонга келган Европа комиссияси президенти Урсула фон дер Ляйен 3 апрель куни мезбон давлат раҳбари Шавкат Мирзиёев билан учрашди, деб хабар қилади унинг матбуот хизмати.
Қайд этилишича, мулоқот чоғида Ўзбекистон ва Европа Иттифоқи ўртасидаги ўзаро манфаатли ҳамкорликни янада кенгайтириш истиқболлари юзасидан фикр алмашилди. 4 апрель куни бўлиб ўтадиган минтақалараро саммит ва иқлим форумини ўтказиш масалалари муҳокама қилинди.
Бир кун аввал фон дер Ляйен Самарқандга келгани хабар қилинганди. Ушбу шаҳар халқаро аэропортида олий мартабали меҳмонни Ўзбекистон Бош вазири Абдулла Арипов ва бошқа расмий шахслар кутиб олди. Европа комиссияси раиси республика ҳукумати раҳбари билан суҳбатдан сўнг Марказий Осиё давлатига ташрифи чоғида ўзи учун махсус тайёрланган қароргоҳга жўнаб кетди.
Дарвоқе, фон дер Ляйен АҚШ президенти Дональд Трамп томонидан қатор давлатлар, жумладан, Европа Иттифоқи давлатларидан товарлар импортига эълон қилинган янги бож тарифларига жуда кескин муносабат билдиргани маълум. Эслатиб ўтамиз, АҚШ маъмурияти ЕИ учун юқори тарифларни 10% базавий ставка билан 20% қилиб белгилаган.
Еврокомиссия раҳбари Трамп қарорини «жаҳон иқтисодиётига, жумладан, ЕИга берилган жиддий зарба» деб атади.
«Ноаниқлик кучаяди ва протекционизмнинг янада ўсишига туртки бўлади. Бунинг оқибатлари, биз эришмоқчи бўлган натижаларга қарши ўлароқ бутун дунё бўйлаб миллионлаб одамлар учун, шунингдек, АҚШнинг энг юқори тарифларига дуч келаётган энг заиф мамлакатлар учун даҳшатли бўлади», — деди фон дер Ляйен.
Унинг сўзларига кўра, кўплаб европаликлар ўзларини қадим иттифоқчиларидан алдангандек ҳис қилишмоқда, аммо Европа жавоб беришга тайёр ва қарши чоралар биринчи пакетини якунламоқда.
«Аммо муқобил йўл бор, музокаралар олиб боришга ҳалиям кеч эмас», — дея хулоса қилади сиёсатчи.
ℹ️ 3-4 апрель кунлари Самарқандда «Марказий Осиё-Европа Иттифоқи» нинг биринчи саммити бўлиб ўтади. Тадбирда Европа кенгаши президенти Антониу Коста, Европа комиссияси президенти Урсула фон дер Ляйен, Ўзбекистон президенти Шавкат Мирзиёев, Қозоғистон президенти Қосим-Жомарт Тўқаев, Қирғизистон президенти Садир Жапаров, Тожикистон ппрезиденти Эмомали Раҳмон ва Туркманистон президенти Сердар Бердимуҳамедов иштирок этади.
«Келажакга сармоя киритиш» шиори остида ўтказилаётган саммитда Европа тикланиш ва тараққиёт банки ва Европа инвестиция банки раҳбарлари ҳам иштирок этиши кутилмоқда. Мулоқотда минтақа давлатлари ва ЕИ ўртасидаги кўп қиррали муносабатлар ва амалий ҳамкорликни ривожлантириш истиқболлари кўриб чиқилади.
