Самарқанд янада яқин бўлмоқда

2023 йил 2 ноябрь куни кун ботиш чоғида «Самарқанд» халқаро аэропортига янги Air Samarkand авиакомпаниясининг Airbus A330-300 русумли биринчи самолёти келиб қўнди.

Самолётнинг қўниши янги авиаташувчи фаолиятининг бошланиши ва, албатта, мамлакат ва бутун минтақа учун муҳим воқеа бўлди.

Air Samarkand авиакомпаниясининг асосий мақсади — Самарқанд шаҳри ва Ўзбекистоннинг қўшни вилоятлари аҳолисига турли мамлакатларга тўғридан-тўғри саёҳат қилиш, хорижлик меҳмонлар учун эса оралиқ пунктларни айланиб ўтиб, Самарқандга ташриф буюриш имкониятини тақдим этишдан иборат.

«Янги авиакомпаниянинг ишга туширилиши Самарқанднинг келажакдаги сайёҳлик, маданият ва ишбилармонлик маркази сифатида ривожланишида муҳим воқеадир, — дейди Air Samarkand муассиси Бахтиёр Фозилов. — Биз Air Samarkandнинг биринчи самолётини кутиб олишдан мамнунмиз. У энг машҳур халқаро йўналишларга хавфсиз ва сифатли хизмат кўрсатиш билан рақобатбардош тўғридан-тўғри рейсларни амалга оширади.

Бортга хуш келибсиз. Андрей Кудряшов фотосурати/«Фарғона»

Ўтган бир йил давомида биз кенг кўламли лойиҳа – Silk Road Samarkand сайёҳлик марказини амалга оширдик ва у ҳудуднинг сайёҳлик салоҳиятини сифат жиҳатидан янги босқичга олиб чиқишни, қадимий меросни замонавий инфратузилма билан уйғунлаштиришни бошлади. Қадимий шаҳарни дунёнинг йирик сайёҳлик ва савдо марказлари билан тўғридан-тўғри боғлайдиган Air Samarkand авиакомпаниясининг йўлга қўйилиши билан ривожланиш сезиларли даражада тезлашади».

Эртаси кун Air Samarkand авиакомпанияси ўзининг очилиш тақдимотини ўтказди. Шаҳарнинг ҳурматли одамлари, оқсоқоллар, жамоатчилик вакиллари ва журналистлар янги лайнерни зиёрат қилиш, экипаж аъзолари билан учрашиш, ҳаттоки кабина ичига қарашга таклиф қилинди.

Airbus A330 — жаҳоннинг етакчи авиакомпанияларида фойдаланиладиган замонавий ва ишончли самолёт. Улар энг узоқ йўналишларда йўловчилар учун ажойиб қулайлик яратади. Самолёт туристик тоифадаги 277 ва бизнес классдаги 36 йўловчини ташишга мўлжалланган бўлиб, 11500 км дан ортиқ масофага тўхтовсиз парвоз қилади.

Ушбу турдаги самолётларда иккита йўлакли кенг салон, қўл юки учун кенг устки қутилар ва ўрнатилган экранли йўловчилар учун кўнгилочар тизим мавжуд. Айни пайтда дунёда 1600 га яқин бундай машиналар муваффақиятли ишлатилмоқда.

«Бу авиакомпания ва Самарқанд учун ҳаяжонли ва узоқ кутилган лаҳзадир. Airbus A330 машҳур самолёт, шунинг учун бизнинг юқори талабларга жавоб берадиган самолётни топиш ва сотиб олиш анча қийин бўлди», — дейди Air Samarkand бош директори Антон Ходжаян.

Air Samarkand бош директори Антон Ходжаян. Андрей Кудряшов фотосурати/«Фарғона»

Ходжаян сўзларига кўра, Air Samarkand яқин кунларда иккинчи самолёт келишини кутмоқда. Бу Airbus A321 бўлиб, ўрта масофали йўналишлар учун мўлжалланган. Умуман олганда, 2023 йил охирига қадар компания бештагача самолётни қабул қилиб, фойдаланишга топширишни режалаштирмоқда.

Куз-қиш мавсуми навигация даврида Самарқанддан қатор хорижий йўналишларга, жумладан, Жануби-Шарқий Осиё, Яқин Шарқ, Туркия ва Хитой шаҳарларига мунтазам ва чартер рейсларини амалга ошириш режалаштирилган.

Самарқандликлар янги самолёт билан танишдилар. Андрей Кудряшов фотосурати/«Фарғона»

Аэропортдаги тақдимотда Air Samarkand арзон авиакомпания эмаслиги алоҳида таъкидланди.

Йўловчиларга тўлиқ хизматлар кўрсатилади. Air Samarkand ўзининг шиори сифатида «Осон учинг» иборасини танлади, яъни кўплаб процедуралар: брон қилиш, багажни рўйхатдан ўтказиш, аэропортда парвозни кутиш – имкон қадар тез ва қулай бўлади.

Самарқанд шаҳри гербида марказий ўринни эгаллаган афсонавий қанотли барс Air Samarkand стал герби ҳисобланади.

Қанотли барс – Air Samarkand эмблемасидир. Андрей Кудряшов фотосурати/«Фарғона»