digital.uz сайти фотосурати
IT Park Uzbekistan, Astana Hub ва Growth Vision Pro компаниялари стартапларнинг Хитой бозорига кириши учун Халқаро хабни ишга туширмоқда. Бу ҳақда Ўзбекистон Рақамли технологиялар вазирлиги матбуот хизмати хабар берди.
Халқаро марказнинг асосий мақсадлари қуйидагилардан иборат:
👉 Хитой экотизимида стартапларни тезлаштириш ва кенгайтириш;
👉 Бизнес миссиялари, b2b учрашувлари ва ихтисослашган кўргазмаларда иштирок этишни ташкил қилиш;
👉 Маҳсулотларни маҳаллийлаштириш стратегияларини ишлаб чиқиш, ҳамкорлар ва инвесторларни излаш;
👉 Таълим дастурлари ва қўшма илмий-тадқиқот лойиҳаларини амалга ошириш;
👉 Хитой технология компаниялари ва венчур фондларини Марказий Осиёга жалб этиш.
IT Park Uzbekistan бош директори Абдулаҳад Қўчқоровнинг сўзларига кўра, Astana Hub билан қўшма иттифоқ ўз самарасини берган: йирик халқаро форумларда икки мамлакатнинг 40 дан ортиқ компанияси ўз лойиҳаларини тақдим этган. Янги ҳаб Хитой бозорига эътибор қаратган ҳолда ушбу ҳаракатни янада кучайтиради, IT Park Uzbekistan резидентларига Хитой акселераторлари, менторлик ёрдами ва инвестиция имкониятларидан фойдаланиш имконини беради.
Growth Vision Pro ўз навбатида, Шэнчжэн ва Пекин технология кластерлари билан ҳамкорликни таъминлайди.
«Хитой нафақат улкан бозор, балки илғор технологиялар манбаи ҳамдир. Бизнинг мақсадимиз — уни Марказий Осиё стартаплари учун очиқ қилишдир,» — дея таъкидлайди Growth Vision Pro директори Лаззат Боранкулова.
Имзоланган меморандум минтақавий IТ-экотизимни ривожлантиришда янги босқични бошлаб беради. Лойиҳа Ўзбекистон ва Қозоғистоннинг инновацион ҳаблар сифатидаги мавқеини мустаҳкамлайди. Яқин ойлар ичида томонлар йўл харитасини амалга оширишга киришадилар, жумладан, Хитойга биринчи бизнес миссияларини уюштириш ва стартаплар учун дастлабки акселерация дастурларини ишга тушириш режалаштирилган.
ℹ️ Таъкидлаш жоиз, Рақамли технологиялар вазирлиги хабарида Growth Vision Pro Хитой компанияси сифатида тақдим этилган. Аслида, у Қозоғистон стартапи бўлиб, 2024 йил сентябрь ойида Ханчжоу шаҳридаги Марказий Осиё инновацион ҳамкорлик маркази билан Хитойда Халқаро хаб яратиш бўйича меморандум имзолаган. Қозоғистон Рақамли ривожланиш вазирлиги хабарида таъкидланишича, хаб Қозоғистон ва Марказий Осиё мамлакатлари стартапларини қўллаб-қувватлайди, уларни ўқув ресурслари, соҳа экспертизаси, алоқа тармоқлари билан таъминлайди, шунингдек, сармояларни жалб қилиш ва Хитой бозорига киришда ёрдам беради. ️ Хитой стартаплари ҳам Марказий Осиё бозорларига чиқиш учун худди шундай ёрдам олади.️
