sport.kz сайти фотосурати
Қозоғистонлик бизнесмен, республика собиқ президенти Нурсултон Назарбоевнинг куёви Тимур Кулибаев Лондондаги уйини 34,7 миллион фунт стерлингга сотди, деб ёзади The Financial Times.
Гап Буюк Британия пойтахти марказидаги ҳашаматли кўчмас мулклари билан машҳур Мейфэре туманидаги Аппер-Гросвенор-Стрит (Upper Grosvenor Street) кўчасидаги 41 таунхаус ҳақида кетмоқда. Келишув жорий йилнинг март ойида бўлиб ўтган. Ҳашаматли уйнинг харидори Deutsche Bank собиқ директори Бен Уильямс томонидан асос солинган North Wind Capital инвестиция компанияси бўлган. Компания мақолада айтилганидек, сотиб олинган мулкни қайта қуришни режалаштирмоқда.
Қулибаев Аппер-Гросвенор-стрит, 42-да жойлашган қўшни бинони ҳам сотмоқчи, бироқ ҳозирча харидор топилмаган.
Кулибаев қарийб йигирма йил давомида Лондон марказида иккита мулкка эгалик қилган. Бундан ташқари, Аппер-Гросвенор-стрит 41-даги уй кўп вақт давомида бўш қолган ва бошпанасизликка қарши курашувчиларни ғазаблантирган, дейди нашр.
Ўтган йил кузида Британиянинг The Times газетаси Қозоғистон биринчи президенти Нурсултон Назарбоевнинг қизи ва куёвининг офшор компаниялари орқали эгалик қилган Лондондаги кўчмас мулклари ҳақида мақола чоп этганди. Тегишли маълумотлар Британия ҳукумати томонидан юритиладиган хорижий компанияларнинг бенефициар эгалари давлат реестри туфайли оммага ошкор бўлган.
Қозоғистонлик миллиардер Тимур Кулибаев Назарбоевнинг ўртанча қизи Динарага уйланган. 2024 йил бошида унинг бойлиги 4,6 миллиард долларга баҳоланган, унинг асосий даромади молиявий бизнесдан келиб тушади. Кулибаев ва унинг рафиқаси мамлакатдаги энг йирик «Қозоғистон Халқ банки»ни назорат қилувчи «АЛМЭКС» компаниясига эгалик қилади.
